རིགས་ལམ་སློབ་གཉེར་ཁང་གི་དབུ་དགེ་དམ་པ་དགེ་བའི་བཤེས་གཉེན་བློ་བཟང་རྒྱ་མཚོ་མཆོག་གི་མཛད་རྣམ་སྙིང་བསྡུས།

མ་སུ་རིར་སློབ་དགེ་གནང་སྐབས།

ཕྱི་ལོ་ ༡༩༥༩ ལོར་བོད་དུ་དུས་འགྱུར་བྱུང་བར་བརྟེན་རྒྱ་གར་དུ་བཙན་བྱོལ་ལ་ཕེབས། མ་འོངས་བོད་ཀྱི་སོན་རྩ་བོད་ཕྲུག་རྣམས་བསྐྱེད་བསྲིང་ཆེད་ཕྱི་ལོ་ ༡༩༦༤ ལོར་བཙན་བྱོལ་བོད་མིའི་ཆེས་ཐོག་མའི་དགེ་འོས་འཛིན་གྲྭར་ཆེད་ཞུགས་ཀྱིས་ཐུན་མོང་རིག་གནས་ཁག་དང་དགེ་འོས་སྦྱོར་བརྡར་གནང་། ཕྱི་ལོ་ ༡༩༦༥ ལོ་ནས་ལོ་ངོ་གཉིས་རིང་མ་སུ་རི་གཏན་སློབ་ཀྱི་ཡན་ལག་སྦ་རི་སི་ཐན་དུ་སློབ་ཕྲུག་ ༡༧༠ ལྷག་ཡོད་པའི་བུ་ཆུང་བའི་ཁང་ཚན་དགེ་རྒན་དང་སློབ་དགེའི་ཐུགས་འགན་བཞེས། སྦ་རི་སི་ཐན་གཏན་སློབ་ཏུ་ཟླ་བསྒྲིལ་བཏང་རྗེས་འཛིན་རིམ་དགུ་པ་ནས་བཅུ་གཅིག་བར་གྱི་བོད་དགེ་དང་། རྒྱ་བཟའ་ཁང་ཚན་གྱི་དགེ་རྒན་ལོ་ལྔ་ཙམ་གནང་། དེ་རྗེས་སློབ་གྲྭའི་ཆོས་དགེའི་ཐུགས་འགན་ཡང་བཞེས་ཏེ་རེས་གཟའ་ལྷག་པ་ནམ་ཡིན་ལ་གསུང་ཆོས་དང་། དུས་ཆེན་ཁག་ཏུ་དུས་ཆེན་སོ་སོའི་ངོ་སྤྲོད་སོགས་སློབ་མ་རྣམས་ལ་ཆོས་དང་འཇིག་རྟེན་ལས་བརྩམས་པའི་བླང་དོར་བཀའ་སློབ་རྒྱུན་མར་གནང་། མ་སུ་རི་གཏན་སློབ་དང་བོད་ཁྱིམ་གཉིས་ཀྱི་ཁོངས་གཏོགས་རབ་བྱུང་བ་རྣམས་དང་ལྷན་དུ་ཚེས་བཅུ་ཉེར་ལྔའི་ཚོགས་མཆོད་དང་། དབྱར་གནས་དང་གསོ་སྦྱོང་གི་ཕྱག་ལེན་ཉམས་བཞེས་གནང་བ་སོགས་སློབ་ཕྲུག་རྣམས་ལ་བོད་མིའི་ཡ་རབས་གོམས་གཤིས་དང་ཆོས་ཕྱོགས་ཀྱི་བཟང་པོའི་བག་ཆགས་གཏིང་ཟབ་འཇོག་གནང་མཛད།

བུ་མོའི་ཁང་ཚན་གཉིས་ཀྱི་དགེ་རྒན་གནང་སྐབས་རྒྱལ་རབས་ལོ་རྒྱུས་ཀྱི་གཏམ་བརྗོད་འཁྲབ་སྟོན་དང་། གླུ་གར་སློབ་ཁྲིད། འཁྲབ་ཆས་ཀྱི་འགྲོ་གྲོན་ཡང་རྒན་སྒེར་ངོས་ནས་གཏོང་གནང་མཛད་པ་སོགས་བོད་ཀྱི་རིག་གཞུང་མི་ཉམས་རྒྱུན་འཛིན་ཐད་ལྷག་བསམ་དག་པའི་ཕྱག་རྗེས་འཇོག་གནང་མཛད། ཐ་ན་སློབ་ཕྲུག་ཚོར་གྱོན་གོས་འཁྲུད་རོགས་གནང་བ་དང་། ཉམ་ཐག་ད་ཕྲུག་སོགས་ལ་སྨན་དང་ཡིག་ཆས་སོགས་ཀྱི་མཐུན་རྐྱེན་གནང་བ། དུས་ཆེན་ཁག་ལ་གཞུང་ནས་གསོལ་ཚིགས་དམིགས་བསལ་མེད་ན་རྒན་སྒེར་ངོས་ནས་ཕྱག་དངུལ་བཏོན་ཏེ་ཞལ་ལག་གནང་བ་སོགས། གསོལ་ཕོགས་ཕལ་ཆེར་སློབ་ཕྲུག་གི་བདེ་དོན་ཆེད་དུ་བཏང་གནང་སྟེ་ཟླ་མཇུག་ལ་གསོལ་ཕོགས་ཀྱི་དངུལ་ལྷག་མ་མེད་པའི་སྐབས་རྒྱུན་དུ་ཡོང་བཞིན་ཡོད།

དེ་ལྟར་ཕྲུ་གུ་རྣམས་ཕ་མས་བསྐྱངས་པ་ལྟར། བྱམས་བརྩེ་ཆེན་པོས་བསྐྱངས་པས་ཕྲུ་གུ་འགའ་རེས་ང་ཚོའི་པ་ལགས་ཞེས་ཀྱང་ཞུ་སྲོལ་བྱུང་། འཛིན་གྲྭའི་ནང་སློབ་ཁྲིད་གནང་རྒྱུ་ཙམ་མ་ཡིན་པར། སློབ་ཕྲུག་རྣམས་ལ་ཐབས་མཁས་ཐུགས་རྗེས་ཆོས་དང་རིག་གཞུང་གི་ལམ་སྟོན་སྐུལ་ལྕག་རྟག་ཏུ་གནང་ལམ་ལ་བརྟེན་སྐབས་དེའི་སློབ་སྤྱི་དམ་པ་བཀའ་ཟུར་ཕྲེང་རིང་མཆོག་དང་ལྷ་སྐུ་ཕྲེང་རིང་རིན་ཆེན་སྒྲོལ་མ་རྣམ་གཉིས་ནས་ཀྱང་བསྔགས་བརྗོད་དང་གུས་བཀུར་ཚད་མེད་གནང་གི་ཡོད།

༸གོང་ས་༸སྐྱབས་མགོན་ཆེན་པོ་མཆོག་གིས་ཀྱང་ཕྱི་ལོ་ ༡༩༦༩ ལོར་མ་སུ་རིར་ཞབས་འཁོད་བཀའ་དྲིན་ཆེ་སྐབས་ཐུགས་དགྱེས་མཉེས་ཆེན་པོས་རྒན་གྱི་གཟིམ་ཤག་ཏུ་ཆིབས་བསྒྱུར་གྱིས་དམིགས་བསལ་ཆེ་བསྟོད་ཀྱང་གནང་ཡོད། ༸གོང་ས་༸སྐྱབས་མགོན་ཆེན་པོའི་སྤྱན་སྔར་དབུ་མའི་དམ་བཅའ་འཇོག་པའི་གོ་སྐབས་བྱུང་ཞིང་། སྐབས་དེར་༸གོང་ས་ཆེན་པོས་ལུང་རིགས་ཐུགས་མྱོང་སུམ་སྦྲགས་ཀྱི་བརྒལ་བརྟག་སྤྲོས་པས་མགོན་པོ་ཀླུ་སྒྲུབ་ཀྱི་ཟབ་མོ་དབུ་མའི་ལྟ་བར་དམིགས་བསལ་ཡིད་ཆེས་དད་གུས་འཁྲུངས་པའི་གོ་སྐབས་ཀྱང་བྱུང་། ༸གོང་ས་ཆེན་པོའི་ཆིབས་བསྒྱུར་སྐབས་རྒན་གྱིས་བྱ་བྲལ་དུ་ཕེབས་འདོད་ཡོད་ཚུལ་ཞུས་པར། བྱ་བྲལ་ལ་ཕེབས་པ་ལེགས་ཀྱང་བོད་པའི་སྤྱི་ཚོགས་ནང་ཤེས་ཡོན་དང་འབྲེལ་བའི་ལས་དོན་བསྒྲུབས་ནས་བསྡད་ན་ལེགས་སྐོར་བཀའ་ཕེབས་ལྟར། མུ་མཐུད་རྩ་ཆེའི་ཆོས་རིག་རྒྱུན་འཛིན་གྱི་མཛད་པ་བསྐྱངས་ནས་བཞུགས་པའི་བླ་ན་མེད་པའི་འབྲས་བུ་ད་ལྟ་རང་རེའི་མཐོང་ཡུལ་དུ་ཡོད་པ་ལྟར་ན། ༸གོང་ས་ཆེན་པོའི་བཀའ་སློབ་དེ་ཉིད་མ་འོངས་ལུང་བསྟན་ལྟ་བུར་གྱུར་པ་མཇལ་ནུས།

རིགས་ལམ་སློབ་གཉེར་ཁང་དབུ་འཛུགས།

ཕྱི་ལོ་ ༡༩༧༡ ལོར་བཞུགས་སྒར་རྡ་སར་ཤེས་རིག་ཚོགས་འདུ་ཐེངས་གཉིས་པའི་སྐབས་མ་སུ་རིའི་སློབ་ཁོངས་གྲྭ་ཕྲུག་རྣམས་མཚན་ཉིད་ཀྱི་གཞུང་ཆེན་མོར་སློབ་གཉེར་བྱེད་འདུན་ཡོད་ཚུལ་སྐོར་༸གོང་ས་ཆེན་པོ་ཚོགས་འདུའི་དབུ་བཞུགས་སུ་ཆིབས་བསྒྱུར་བསྐྱངས་པ་དང་བསྟུན་སྙན་གསན་ཕུལ་བ་ལྟར། ༸གོང་ས་ཆེན་པོའི་ལམ་སྟོན་མཐུན་རྐྱེན་ཐུགས་རྗེ་ཆེ་བའི་འོག །ཕྱི་ལོ་ ༡༩༧༣ ལོར་གཞུང་ཆེན་ལ་སློབ་གཉེར་བྱེད་ཡུལ་རིགས་ལམ་སློབ་གྲྭ་གསར་དུ་དབུ་འཛུགས་ཀྱིས་རྒན་ཉིད་དབུ་དགེ་གཅིག་ལྕོགས་སུ་བསྐོ་གཞག་གནང་། སྐབས་དེར་སློབ་ཕྲུག་གྲངས་ཉེར་དགུ་དང་མ་བྱན་གཉིས། དབུ་དགེ་གཅིག་ལྕོགས་རྒན་དམ་པ་ཁོང་ཉིད་བཅས་ལས་མེད།

དེ་ཡང་རྒན་ཉིད་ཀྱིས་༸གོང་ས་ཆེན་པོར་མཇལ་བཅར་ཞུ་སྐབས། སློབ་གཉེར་བ་རྣམས་སེམས་ཤུགས་སྐྱེད་ཆེད་འཚོ་ཕོགས་སློབ་ཕྲུག་རྣམས་དང་འདྲ་མཉམ་ཙམ་ལས་མི་ཞུ་རྒྱུ་དང་། གོ་གནས་དང་མིང་གྲགས་སོགས་ལ་མི་ལྟ་བར་༸གོང་ས་ཆེན་པོའི་བཀའ་དགོངས་ལྟར་ལས་དོན་གང་ཅིར་ཧུར་ཐག་ཞུ་རྒྱུ། སྒེར་དོན་སྤངས་ནས་སྤྱི་དོན་འབའ་ཞིག་བསྒྲུབ་རྒྱུ་བཅས་ལྷག་བསམ་རྣམ་པར་དག་པས་དམ་བཅའ་ཆེན་པོ་གསུམ་ཕུལ་གནང་ལྟར་སྐུ་ཚེ་གང་པོར་ཆེ་ཚུལ་ཡོངས་སུ་སྤངས་ཏེ། ཆོག་ཤེས་ཆེན་པོས་སློབ་གཉེར་བ་རྣམས་དང་གསོལ་ཕོགས་གཅིག་མཚུངས་ལས་ལེན་པར་མི་མཛད་པ་དང་། སློབ་གཉེར་བ་རྣམས་དང་སྐྱིད་སྡུག་མཉམ་མྱོང་གིས་འཛིན་སྐྱོང་དང་དཔེ་ཁྲིད་གནང་བ་སོགས་ཀྱི་ཐུགས་འགན་ཡོངས་རྫོགས་བཞེས། རིམ་བཞིན་དབུ་ཕར་སོགས་ཀྱི་སྟེང་གཞུང་ཆེན་གཞན་དང་ཐ་སྙད་རིག་གནས་ཀྱི་སློབ་ཚན་ཇེ་མང་དང་། སློབ་ཐོན་ལག་ཁྱེར་ཚད་ལྡན་བཟོ་བ་སོགས་སློབ་གཉེར་ཁང་གི་འགྲོ་ལུགས་འཐུས་སྒོ་ཇེ་ཚང་དུ་གཏོང་གནང་མཛད་ཅིང་། སློབ་གཉེར་ཁང་གི་ཕྱི་སྣོད་ཀྱི་བཀོད་པ་རྒྱ་བསྐྱེད་གནང་བ་སོགས་མཛད།

བོད་ནས་གསར་དུ་འབྱོར་བ་སོགས་ལ་ཤེས་ཡོན་མཐུན་རྐྱེན་སྦྱོར་སྤྲོད།

སྦིར་སློབ་གྲྭ་མ་ཚུགས་པའི་སྔོན་ཏེ། ཕྱི་ལོ་ ༡༩༨༠ ནས་ ༡༩༨༦ བར་བོད་ནས་གསར་དུ་འབྱོར་བའི་སློབ་གཉེར་བ་ ༥༠༠ སྐོར་ལ་བོད་ཡིག་དང་ཨིན་ཡིག་སོགས་སོ་སོའི་བློ་རིག་དང་འཚམས་པའི་སློབ་སྦྱོང་གི་མཐུན་རྐྱེན་བསྐྲུན་པ་དང་། ཕྱི་ལོ་ ༡༩༩༡ ལོར་སླར་ཡང་སྦིར་སློབ་གྲྭར་མ་ཞུགས་པའི་བོད་འབྱོར་སློབ་མ་ཉི་ཤུ་ལྷག་ལ་རིགས་སློབ་རང་ནས་འགྲོ་གྲོན་ནར་གཏོང་གིས་རིག་གནས་འཛིན་གྲྭ་ཞིག་གསར་འཛུགས་ཞུས། ཕྱི་ལོ་ ༡༩༩༢། ༡༩༩༤། ༡༩༩༥ ལོ་སོ་སོར་ཤེས་རིག་ལྷན་ཁང་ནས་འགྲོ་གྲོན་བཏང་བའི་དགེ་འོས་སྐབས་དང་པོ་དང་། གཉིས་པ། གསུམ་པ་བཅས་ཀྱི་སློབ་མ་དགུ་བཅུ་ལྷག་ལ་དགེ་འོས་སྦྱོང་བརྡར་དང་། ཕྱི་ནང་ཤེས་ཡོན་སློབ་སྦྱོང་གི་གོ་སྐབས་གནང་། སྐབས་གསུམ་པའི་དགེ་འོས་ནང་རིགས་སློབ་རང་ཁོངས་ནས་སྦྱིན་བདག་བཙལ་ཏེ་དགེ་འོས་འཛིན་གྲྭ་གཅིག་ཁ་བསྣོན་ཞུས་ཏེ། སྐབས་དེའི་བཙན་བྱོལ་བོད་མིའི་སློབ་གྲྭ་ཁག་ཏུ་བོད་དགེའི་དཀའ་ངལ་སེལ་ཐུབ་པའི་གནས་སྟངས་ཧ་ཅང་ལེགས་པོ་བྱུང་ཡོད། དེ་བཞིན་གཞུང་ཞབས་འདེམས་ལྷན་གྱི་གོ་སྒྲིག་འོག་སྲི་ཞུ་བ་གྲངས་ཉེར་དགུར་ལས་བྱེད་འོས་སྦྱོང་གི་ཟབ་སྦྱོང་ལན་གཉིས་ཕུལ།

གཞི་རིམ་སློབ་གྲྭའི་དགུང་སེང་སྐབས་ཕྱོགས་མཐའི་སློབ་གཉེར་བ་མང་པོར་ཕྱི་ནང་རིག་གནས་སློབ་སྦྱོང་དང་བསྐྱར་སྦྱོང་ལམ་སྟོན་གྱི་གོ་སྐབས་བསྐྲུན་པ་དང་། ཧི་མ་ལ་ཡའི་རི་བརྒྱུད་དུ་ནང་པའི་རིག་གཞུང་མི་ཉམས་རྒྱུན་འཛིན་སླད་ཕར་ཕྱིན་འཛིན་གྲྭ་གསར་པ་ནམ་ཚུགས་སྐབས་ཧི་མ་ལ་ཡའི་སློབ་གཉེར་བའི་ཆེད་དམིགས་བསལ་ས་མིག་ལྔ་གནང་གི་ཡོད། རིགས་ལམ་སློབ་གཉེར་ཁང་དུ་ཆོས་བརྒྱུད་དང་ལུང་ཚན་སོགས་ཀྱི་དབྱེ་བ་མེད་པར་ཕྱི་ནང་མི་རིགས་ཀུན་ལ་བོད་ཀྱི་ཆོས་དང་རིག་གཞུང་ལ་སློབ་གཉེར་བྱེད་པའི་གོ་སྐབས་གནང་ཡོད་པ་ལྟར། ད་ལྟ་ཕན་ཐེ་ཝན་དང། ཀོ་རི་ཡ། ཝེད་ནམ། སོག་པོ། ནུབ་ཕྱོགས་ཡུལ་གྲུ་ཁག །བོད་དང་ཧི་མ་ལ་ཡ་སོགས་མི་རིགས་འདྲ་མིན་གྱི་སློབ་གཉེར་བ་ཧ་ཅང་མང་པོ་སློབ་ཐོན་ཐུབ་པ་བྱུང་ཡོད།

བཞུགས་སྒར་ཁུལ་གྱི་བཙུན་དགོན་ཁག་གི་བཙུན་མ་རྣམས་ཀྱི་ཆོས་ཕྱོགས་སློབ་གཉེར་ཡར་རྒྱས་སླད་རིགས་སློབ་ཏུ་དཔེ་ཁྲིད་གནང་བ་དང་། བཙུན་དགོན་སོ་སོའི་སྒྲིག་གཞི་གཏན་འབེབས་སོགས་ཀྱི་རོགས་ཕན་ཅི་ལྕོགས་གནང་ཞིང་། དཀའ་ངལ་ཅན་ལ་སྡོད་ཁང་གི་མཐུན་རྐྱེན་བསྐྲུན་པ་སོགས་འཕྲལ་ཕུགས་གང་ལ་གང་འོས་ཀྱི་རོགས་ཕན་རྟག་ཏུ་གནང་གི་ཡོད། དམ་པ་ཁོང་ནས་སློབ་གཉེར་བ་རྣམས་ཀྱི་ཤེས་ཡོན་ཡར་རྒྱས་ཙམ་མིན་པར་རྟག་ཏུ་ཆོས་དང་འཇིག་རྟེན་གྱི་བཟང་པོའི་བསླབ་བྱ་དང་། ཆོས་ཕྱོགས་ཉམས་བཞེས་དང་འབྲེལ་ནས་ཡ་རབས་ཀྱི་མིག་དཔེ་བསྟན་ཏེ་སློབ་གཉེར་བ་རྣམས་ཡ་རབས་སྤྱོད་བཟང་གི་ལམ་དུ་འཁྲིད་གནང་མཛད་ཀྱིན་ཡོད།

ཕྱི་ནང་ཚོགས་སྡེ་དང་དད་ལྡན་སྒེར་པ་ཁག་གིས་གདན་ཞུས་ལྟར་རྒན་མཆོག་སོག་ཡུལ་དང་། ཨིཛ་རེལ། ཉི་ཧོང་། ཨ་རི། ཡོ་རོབ། ཧོང་ཀོང་། ཨུ་རུ་སུ་བཅས་ཤར་ནུབ་རྒྱལ་ཁབ་ཁག་དུ་མར་ཕེབས་ཏེ་ཆོས་འབྲེལ་རྒྱ་ཆེ་བསྐྱངས་ཤིང་། ཨིཛ་རེལ་ལ་མཚོན་ན། བོད་ཀྱི་ནང་པའི་དགེ་སློང་གི་གྲས་ནས་ཆོས་གསུང་མཁན་ཐོག་མ་དེ་རྒན་དམ་པ་ཡིན། ཕྱི་ལོ་ ༡༩༨༥ ཙམ་ནས་ཨ་རིར་གནས་བཞུགས་རྒྱ་རིགས་དགེ་སློང་བགྲེས་པོ་བསྟན་འཛིན་བྱམས་ཆེན་དང་བླ་སློབ་ཀྱི་འབྲེལ་བ་བྱུང་བར་བརྟེན་ནས། ལྷོ་ཤར་ཨེ་ཤི་ཡ་དང་ཨ་རིའི་ཁུལ་གྱི་སློབ་མ་མི་ཉུང་བ་ཞིག་ལ་ཕན་ཐོགས་ཆེན་པོ་བྱུང་ཞིང་། དགེ་སློང་དང་འབྲེལ་ཡོད་ཤུལ་འཛིན་སློབ་མའི་གྲས་ནས་རིགས་སློབ་སྟེང་ཤོད་ལ་དཔལ་འབྱོར་གྱི་མཐུན་རྐྱེན་ཡང་རྒྱ་ཆེ་གནང་བ་བྱུང་ཡོད།

ས་རཱ་མཐོ་སློབ་གསར་འཛུགས།

༸གོང་ས་༸སྐྱབས་མགོན་ཆེན་པོའི་བཀའ་དགོངས་ལམ་སྟོན་དང་། རྒན་དམ་པའི་ཐུགས་བསྐྱེད་དཀའ་སྤྱད་ལ་བརྟེན་ནས་ཕྱི་ལོ་ ༡༩༩༣ ལོར་བཞུགས་སྒར་རིགས་ལམ་སློབ་གཉེར་ཁང་གི་ཡན་ལག་ས་རཱ་བོད་ཀྱི་མཐོ་རིམ་སློབ་གཉེར་གསར་བསྐྲུན་དབུ་འཛུགས་ཞུས་ཏེ། ཕྱི་ལོ་ ༡༩༩༨ ཟླ་བ་ ༨ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཞུང་འབྲེལ་དབུ་འབྱེད་རབ་གནས་བཀའ་དྲིན་བསྐྱངས་ཡོད། དེ་ནས་བཟུང་འདི་ལོ་ཕྱི་ལོ་ ༢༠༢༥ བར་ལོ་ངོ་ ༢༧ ཧྲིལ་པོ་སོང་བའི་རིང་མཐོ་རིམ་རིག་གནས་རབ་འབྱམས་པ་དང་། གཙུག་ལག་རབ་འབྱམས་པ། དགེ་རྒན་འོས་སྦྱོང་། སྲི་ཞུའི་ལས་བྱེད་འོས་སྦྱོང་། ཕྱི་རྒྱལ་སྐད་ཡིག་འཛིན་གྲྭ། ནང་དོན་རིག་པའི་འཛིན་གྲྭ། ཟུར་སྦྱོང་འཛིན་གྲྭ། ནང་པའི་ཚན་རིག་དང་ལྟ་གྲུབ་འཛིན་གྲྭ། རབ་བྱུང་རིག་གནས་འཛིན་གྲྭ་སོགས་ནས་ཁྱོན་སློབ་གཉེར་བ་ ༤༠༠༠ ལྷག་སློབ་ཐོན་ཐུབ་པ་བྱུང་སྟེ། ཕྱི་ནང་སྤྱི་ཚོགས་སུ་ཆོས་རིག་རྒྱུན་འཛིན་དར་སྤེལ་ཐད་ཞབས་འདེབས་མི་དམན་པ་ཞུ་རྒྱུའི་གོ་སྐབས་བྱུང་ཡོད།

རྒན་ཉིད་ཀྱིས་སློབ་གཉེར་ཁང་གི་འཛིན་སྐྱོང་དང་དཔེ་ཁྲིད་སོགས་ཀྱི་ཞོར་ལ་ཆུ་ཚོད་སྐར་ཆ་ཙམ་ཡང་ཆུད་ཟོས་སུ་མ་བཏང་བར་ནང་དོན་རིག་པ་དང་། ཐུན་མོང་བའི་རིག་གནས་བརྗོད་བྱར་བྱས་པའི་གཞུང་ལུགས་པོད་ ༡༥ བརྩམས་གནང་མཛད་པ་ཕྱི་ལོ་ ༢༠༢༤ ལོར་རིགས་སློབ་མ་ལག་དབུ་བརྙེས་ནས་ལོ་ངོ་ལྔ་བཅུ་དང་ཉེར་ལྔ་འཁོར་བའི་དུས་དྲན་སྟེང་དཔར་བསྐྲུན་འགྲེམ་སྤེལ་གནང་ཡོད།

དགོངས་པ་གཞན་དོན་དུ་གཤེགས་ཚུལ།

ཕྱི་ལོ་ ༡༩༧༨ ལོ་ནས་༸གོང་ས་མཆོག་གི་དགོངས་གཞི་ལྟར་དོལ་རྒྱལ་བསྟེན་གསོལ་མི་རུང་བའི་སྐོར་ལེགས་ཉེས་བླང་དོར་ལམ་སྟོན་འཛེམས་ཟོན་མེད་པར་གནང་བའི་རྐྱེན་ལ་བརྟེན་ནས། རྒན་ཉིད་བོད་ཀྱི་ཆོས་རིག་དར་སྤེལ་གྱི་མཛད་འཕྲིན་རབ་ཏུ་རྒྱས་བཞིན་པའི་སྐབས་ཏེ། ཕྱི་ལོ་ ༡༩༩༧ ཟླ་ ༢ ཚེས་ ༤ ཕྱི་དྲོའི་ཆུ་ཚོད་ ༧ ནས་ ༨ ཙམ་ལ་དམ་སྲི་དོལ་རྒྱལ་བའི་རྗེས་འབྲང་ཤེས་རྒྱུད་གདོན་གྱིས་བརླམས་པའི་ལོག་སྨོན་སྐྱེ་བོ་དུ་མས་སྐུ་ལུས་ལ་གྲི་མཚོན་བསྣུན་ཏེ་གློ་བུར་སྐུ་སྲོག་བཀྲོངས་པ་ནི་ང་ཚོ་རིགས་སློབ་སྟེང་ཤོད་ཀྱི་ཆག་སྒོ་ཙམ་དུ་མ་ཟད་བོད་མི་རིགས་སྤྱི་ལ་འཕྲད་པའི་གསབ་པར་དཀའ་བའི་གྱོང་གུད་ཅིག་ཡིན་པ་བཅས། ༸གོང་ས་༸སྐྱབས་མགོན་ཆེན་པོའི་བཀའ་དགོངས་གཙུག་ཏུ་བཀུར་ཏེ། བོད་ཀྱི་ཆོས་རིག་སྲུང་སྐྱོབ་དར་སྤེལ་སླད་གཞན་འགྲན་མི་ནུས་པའི་མཛད་འཕྲིན་ཕྱག་རྗེས་འཇོག་གནང་མཛད་པའི་རིགས་སློབ་དབུ་དགེ་དམ་པ་དགེ་བའི་བཤེས་གཉེན་བློ་བཟང་རྒྱ་མཚོ་དཔལ་བཟང་པོའི་མཛད་འཕྲིན་ཉུང་བསྡུས་འདི་བཞིན། རྗེས་འཇུག་བུ་སློབ་རྣམས་ལ་རྗེས་དྲན་དད་རྟེན་དང་། བོད་ཀྱི་ཆོས་རིག་སྲུང་སྐྱོབ་ལ་ཐུགས་སྣང་དོན་གཉེར་ལྡན་པའི་མི་རབས་གསར་པ་རྣམས་ལ་ལམ་སྟོན་མིག་དཔེའི་ཚུལ་དུ་བཀོད་པ་ལགས།

དབུ་དགེ་དམ་པའི་ཡང་སྲིད།

རིགས་སློབ་དབུ་དགེ་དམ་པའི་ཡང་སྲིད་བསྟན་འཛིན་ཚེ་བརྟན་རིན་པོ་ཆེ་ནི། ཕྱི་ལོ་ ༢༠༠༡ ལོའི་ཟླ་ ༥ ཚེས་ ༡༤ ཉིན་ལ་དྭགས་ཀྱི་རྒྱལ་ས་གླེ་རུ་ཡབ་ཟངས་དཀར་བ་ཚེ་རིང་རྒྱལ་མཚན་དང་། ཡུམ་བོད་རིགས་སྐལ་བཟང་དབྱངས་སྐྱིད་གཉིས་ཀྱི་སྲས་སུ་འཁྲུངས། ཕྱི་ལོ་ ༢༠༠༡ ཟླ་ ༤ ཚེས་ ༢༨ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་དགེ་དམ་པའི་ཚ་བོ་རིགས་ལམ་སློབ་ཟུར་དགེ་བཤེས་བློ་བཟང་ཡེ་ཤེས་ལགས་སུ་དུས་གསུམ་གསལ་གཟིགས་ཀྱི་བཀའ་སློབ་ལམ་སྟོན་སྩལ་དགོངས་ལྟར། ཕྱི་ལོ་ ༢༠༠༦ ཟླ་ ༢ ཚེས་ ༡ ཉིན་༸གོང་ས་ཆེན་པོས་ཞིང་གཤེགས་དབུ་དགེ་དམ་པའི་ཡང་སྲིད་དུ་ངོས་འཛིན་བཀའ་ཡིག་བཀའ་དྲིན་ཆེ་སྩལ་བྱུང་ཞིང་། ཕྱི་ལོ་ ༢༠༠༩ ཟླ་ ༤ ཚེས་ ༦ གཟའ་སྐར་འཕྲོད་སྦྱོར་དགེ་བའི་ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་རང་གཞུང་བཀའ་ཤག་དང་། ལྷན་ཁང་ཁག །བོད་མི་མང་སྤྱི་འཐུས་ལྷན་ཁང་། དགོན་སྡེ་དང་སློབ་གྲྭ་ཁག །ཚོགས་སྡེ་ཁག་བཅས་ཀྱི་མཛད་གཙོ་རྣམ་པས་གཙོས་སེར་སྐྱ་སྟོང་ཕྲག་མང་པོ་འདུ་འཛོམས་ཐོག་ཁྲི་འདོན་མཛད་སྒོ་ཟབ་རྒྱས་བསྐྱངས། ཟླ་ ༤ ཚེས་ ༧ ཉིན་སླར་ཡང་རིགས་ལམ་སློབ་གཉེར་ཁང་གི་ཡན་ལག་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་རིགས་སློབ་མ་ལག་གཉིས་ཀྱི་དགེ་ལས་སློབ་གཉེར་བ་ཡོངས་ཀྱིས་ཕེབས་བསུ་ཟབ་རྒྱས་དང་འབྲེལ་ཁྲི་འདོན་མཛད་སྒོ་བསྐྱངས་ཤིང་། སྐབས་དེར་བོད་སྐྱོང་ལྷ་སྲུང་གནས་ཆུང་རྡོ་རྗེ་གྲགས་ལྡན་སྐུ་ཕེབས་ཀྱིས་འབྱུང་འགྱུར་སློབ་གཉེར་གནང་ཕྱོགས་སོགས་ཀྱི་བཀའ་ལུང་ཕེབས།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་དང་བོད་སྐྱོང་ལྷ་སྲུང་གནས་ཆུང་རྡོ་རྗེ་གྲགས་ལྡན་གྱི་བཀའ་ལུང་ལྟར། ཕྱི་ལོ་ ༢༠༠༩ ཟླ་ ༩ ཚེས་ ༢༩ གཟའ་སྐར་འཕྲོས་སྦྱོར་དགེ་བའི་ཉིན་ཡང་སྲིད་རིན་པོ་ཆེ་མཆོག་བྱེས་ཀྱི་གདན་ས་ཆེན་པོ་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་དུ་ཆོས་ཞུགས་མཛད་དེ། ད་ལྟའི་ཆར་མཚན་ཉིད་ཀྱི་གཞུང་ཆེན་མོར་ཐོས་བསམ་སློབ་གཉེར་རྒྱུན་མཐུད་གནང་མུས་སུ་བཞུགས་ཡོད་ཅིང་། ཕྱི་ལོ་ ༢༠༢༥ ཟླ་ ༢ ཚེས་ ༡༡ ཉིན་བྱེས་ཀྱི་གདན་ས་ཆེན་པོ་བཀྲ་ཤིས་ལྷུན་པོར་སྤྱི་ནོར་༸གོང་ས་༸སྐྱབས་མགོན་ཆེན་པོའི་དྲུང་ནས་བསྙེན་རྫོགས་ཀྱི་སྡོམ་པ་ནོད་པར་མཛད་ཡོད།