ས་རཱ་བོད་ཀྱི་མཐོ་རིམ་སློབ་གཉེར་ཁང་ནི་བཞུགས་སྒར་རིགས་ལམ་སློབ་གཉེར་ཁང་གི་ཡན་ལག་ཡིན་ཞིང་། དམིགས་ཡུལ་གྱི་ཆ་ནས་རིགས་སློབ་ཨ་མ་ནི། བཀའ་པོད་ལྔ་གཙོར་གྱུར་ནང་པའི་གཙུག་ལག་གཞུང་ཆེན་ལ་ཐོས་བསམ་སློབ་གཉེར་བྱས་ཏེ་བོད་ཀྱི་སངས་རྒྱས་པའི་ཆོས་ཚུལ་རྒྱུན་འཛིན་དར་སྤེལ་བྱེད་རྒྱུ་དང་། འདི་ག་ས་རཱ་བོད་ཀྱི་མཐོ་སློབ་ཏུ་སྐྱ་སེར་དབྱེར་མེད་ཀྱི་སློབ་གཉེར་བ་རྣམས་ནས་བོད་ཀྱི་བརྡ་སྤྲོད་དང་། རྩོམ་རིག །རྒྱལ་རབས། ནང་པའི་རྨང་གཞིའི་ལྟ་གྲུབ་བཅས་ལ་སློབ་གཉེར་བྱས་ཏེ། གཙོ་བོ་བོད་ཀྱི་ཐ་སྙད་རིག་གནས་རྒྱུན་འཛིན་དར་སྤེལ་བྱེད་རྒྱུ་དེ་ཡིན།
དེ་ཡང་བོད་ནང་རྒྱ་ནག་དམར་པོའི་སྲིད་གཞུང་གིས་བོད་ཀྱི་ཆོས་དང་རིག་གཞུང་། མི་རིགས་དང་བཅས་པ་རྩ་མེད་གཏོང་བའི་སྲིད་བྱུས་འོག་བོད་ཀྱི་ཆོས་རིག་རྩ་བརླག་ཏུ་འགྲོ་བཞིན་པ་དང་། བཙན་བྱོལ་སྤྱི་ཚོགས་ནང་གོ་ལ་གཅིག་གྱུར་གྱི་ཤུགས་རྐྱེན་དང་། གཞན་དབང་སྟབས་བསྟུན། སྐབས་འཕྲལ་གྱི་འཚོ་གོས་གལ་ཆེར་འཛིན་པའི་སྤྱོད་ཚུལ་བཅས་ཀྱི་འོག་བོད་ཀྱི་ཆོས་རིག་ཉམས་ཆག་ཏུ་འགྲོ་བཞིན་པའི་དུས་སྐབས་འདིར་ད་ཕན་མཐོ་སློབ་འདིས་དམིགས་ཡུལ་ལྟར་བཙན་བྱོལ་བོད་མིའི་སྤྱི་ཚོགས་ནང་བོད་ཀྱི་ཆོས་རིག་སྲུང་སྐྱོབ་དར་སྤེལ་སླད་གཟེངས་ཐོན་ཞབས་ཞུ་གང་ལེགས་བསྒྲུབས་ཡོད་ཅིང་། འབྱུང་འགྱུར་ཡང་དེ་དོན་བསྒྲུབ་རྒྱུ་འདོར་མེད་ཀྱི་འགན་འཁྲིར་བཟུང་ཡོད།

• བོད་དང་ཧི་མ་ལ་ཡའི་སྤྱི་ཚོགས་ནང་ཆོས་དང་རིག་གཞུང་དར་སྤེལ་རྒྱུན་འཛིན་བྱེད་ནུས་ཀྱི་མི་སྣ་སྐྱེད་སྲིང་བྱེད་རྒྱུ།
• ནུབ་ཕྱོགས་སུ་འཚོ་སྡོད་བཙན་བྱོལ་བོད་མིའི་སྤྱི་ཚོགས་ཀྱི་གཟའ་མཇུག་སློབ་གྲྭ་སོགས་ཆོས་རིག་བསྟི་གནས་ཁག་ཏུ་ཆོས་རིག་དར་སྤེལ་ཞབས་འདེགས་སྒྲུབ་ནུས་ཀྱི་མི་སྣ་སྐྱེད་སྲིང་བྱེད་རྒྱུ།
• བོད་རིག་པའི་སྡེ་ཁག་ནང་བོད་ཀྱི་ཆོས་རིག་ཞིབ་འཇུག་ཐད་ཞབས་འདེགས་སྒྲུབ་ནུས་ཀྱི་མི་སྣ་སྐྱེད་སྲིང་བྱེད་རྒྱུ།
• དེང་སྐབས་བོད་པའི་གཞོན་སྐྱེས་རྣམས་མཚན་ཉིད་ཚང་བའི་བོད་མིའི་ངོ་བོར་འཚར་ལོངས་འཚོ་གནས་མི་ཐུབ་པའི་དཀའ་ངལ་ཞིག་ཡོད་པ་འདི་ལས་གྲོལ་ཏེ། བོད་སྐད་དང་། བོད་ཀྱི་ཆོས་རིག །བོད་པའི་ལེགས་བྱང་གོམས་སྲོལ་ལ་མྱོང་རྒྱུས་ཡོད་པའི་མཚན་ཉིད་ཚང་བའི་བོད་མིའི་ངོ་བོར་སྐྱེད་སྲིང་བྱེད་རྒྱུ།
• བོད་ཀྱི་ཆོས་དང་རིག་གཞུང་རྒྱུན་འཛིན་དར་སྤེལ་གྱིས་འབྱུང་འགྱུར་གནའ་བོའི་ཆོས་རིག་དཔལ་ཡོན་དང་། དེང་རབས་ཀྱི་ཤེས་རིག་དར་རྒྱས་ཕུན་སུམ་ཚོགས་པའི་ཞི་བདེ་ལྡན་པའི་བོད་ཀྱི་སྤྱི་ཚོགས་ཤིག་འཛུགས་སྐྲུན་བྱེད་རྒྱུ།
• ༸གོང་ས་༸སྐྱབས་མགོན་ཆེན་པོའི་ཐུགས་འགན་རྣམ་བཞིས་མཚོན་རླབས་ཆེན་དགོངས་བཞེད་ཟབ་མོ་རྣམས་ཇི་བཞིན་གསལ་རྟོགས་ཉམས་ལེན་གྱིས་སྤྱི་སྒེར་སྤྱི་ཚོགས་ནང་གཞན་ཕན་སྲི་ཞུ་སྒྲུབ་པའི་མི་སྣ་སྐྱེད་སྲིང་བྱེད་རྒྱུ་བཅས་ནི་མཐོ་སློབ་འདིའི་དམིགས་ཡུལ་ཡིན།